هيسموني إيه ؟؟

نفس الكلام اللي زهقت منه ....

من ساعة ما عرفوا ان فيه ضيف جديد جاي في السكة
و كل الناس ملهاش سيرة غير يا ترى اللي جاي ده واد و للا بت
و لو واد هتسموه ايه
و لو بنت هتسموها ايه
و بسمع حاجات غريبه جدا جدا
تيته تقول عمرو على أسم خاله و بابا يقولها طب ما نسميه سيد على أسم جده
وواحده صاحبة ماما أنا مضايق منها جدا
كل ما تشوفها تقولها أزيك يا أم فتحي و أزي فتحي
أنا ... يبقى أسمي فتحي !!!!!!
و اللي يقول جعلص
ال جعلص ال
جعلص ده أسم كلب يا بشر

و للي زاد و غطى بقى اللي يقول لو بنت سموها سوكة
سوكه ده أسم مطلقة مش طفلة على رأي أبو علي

بابا بقى نفسة يسميني سراج الدين (( ده لو أنا ولد يعني )) بس ماما مش راضية
أصلها بيني و بينكم كده لدغه في ( ر ) مش بتعرف تقوله ريه زينا
بتقوله ييه
بس و الله مش باينة خالص و أنا لو سموني سراج و ماما ندهتلي مش هاخد بالي خالص
انها بتقول سياج الدين

بابا و ماما بقى ليل نهار يدوروا على أسامي جديده بين الأصحاب و الأهل و ع النت
و بالذات ع النت لحد ما جوجل قرف منهم و قرب يشتمهم

أخر الأفتكاسات بقى
لوسيندا و لوجينا

طقت في دماغ ماما مرة واحده
لوسيندا كان أسم بنت زيي القمر في فيلم أجنبي و علق مع ماما أوي
و بابا مكنش متصور انه له معنى بالعربي لحد ما الحاج جوجل قاله
لوسيندا : و تعني الوجه الحسن

أما لوجينا فالبت منى بنت ام محمد جيران تيته قالتلها عليه
و عجب ماما جدا و طبعا قالت لبابا يشوف معناه
و طلع له معنى جميل أوي و هو
الفضة الخالصة السائلة و النقية

ماشي الاتنين حلوين
بس ده لو طلعت بنوتة

فيه بقى أسمين أنا بسمعهم كتير في البيت
سيف الله
أو شهد

يعني يبقى أسمي سيف الله حسن محمد حزمان
أو شهد حسن محمد حزمان

عموما أنا مش أعرف أنا هيبقى أسمي ايه
و هقولكم لما أعرف

بااااااااي