انا كبرت شوية

أنا بقالي 4 شهور في بطن ماما

دي صورتي
أنا كبرت خالص دلوقتي و جسمي كله إتشكل
راسي و جسمي و ايدي و رجلي
بس لسة مش يعرفوا أنا ولد و للا بنت

ماما نفسها في بنوته و بابا بيقول كل اللي يجيبوا ربنا كويس
ولد أو بنت المهم انه سليل الحزامنه

أنا بقيت أحس باللي حواليا دلوقتي و بفرك كتير جوه بطن ماما
و هي تقول لبابا إبنك بيضربني و هو يقولها إستني عليه لما ييجي و أنا أجيبلك حقك
عشان كده أنا هغيظه و مش نازل هااه .. بس

أنا عرفت صوت ماما و بفرح أوي لما بتتكلم معايا و يا سلام بقى لما بتحكيلي حدوتة
برقص جوه من الفرح و بخبط فيها كتير أوي
لحد ما هي تنادي بابا و تقوله تعالى شوف ابنك بيتحرك كتير
و أول لما أسمع صوت بابا الخشن أخاف و أسكت و أسمعه و هو بيقولها مش حاسس بحاجه
و أحس إنه اضايق بس هما مش عارفين إني لسه مخدتش على صوته و ان صوته غريب بالنسبه لي

أنا بقى بتخنق مووت لما بسمعهم بيتكلموا على مصاريفي
و ماما تقول لبابا الميزانية هتتغير يا أبو العيال
هتجيب بامبرز و لبن و هدوم للبيبي و عايزين سرير عشان ينام عليه
و مشايه عشان لما نخرج و جزم و شرابات للنونو و كمان مكعبات و عربيات و عرايس
و كوره يمكن يطلع موهوب و يلعب في الأهلي
و ....
و تفضل تطلب في حاجات لحد بابا ما يشد في شعره
لحد ما شعره خلص خالص

و أخيرا بابا إقترح إقتراح يريحه إنه يفتح حساب في البنك يقبل فيه التبرعات للنونو
و يعمل إعلانات في التليفزيون
لأصحاب القلوب الرحيمة
تبرعوا و لو ببمبرزايه


مش فاهم أنا ايه الناس دي
طالما مش أد الخلفة كانوا بيجيبونا ليه

باااااااااااي